Category Archives: BAWINILE NGCOBO

Isolezwe: Lusezithebeni zenkantolo elokuqedwa kwemijondolo

Leave a reply

http://www.isolezwe.co.za/index.php?fArticleId=4700564

Lusezithebeni zenkantolo elokuqedwa kwemijondolo

November 07, 2008 Edition 1

BAWINILE NGCOBO

KUZOQHUBEKA namuhla enkantolo enkulu yaseThekwini ukulalelwa kwesicelo sokuthi kusulwe umthetho wokuqeda imijondolo kwaZulu Natal, i-Slums Act.

Lesi sicelo sifakwe yinhla-ngano eyaziwa ngokuthi Abahlali Basemjondolo kanti ukulalelwa kwaso kuqale izolo. Abantu abahlala ezindaweni eziyimijondolo ngaphansi kwale nhlangano bebegcwele ngaphandle kwenkantolo becula amaculo omzabalazo bezokweseka abameli babo.

Ngaphakathi ummeli wabo, uMnuz Heidi Barnes, ubeke phambi kweJaji uVuka Shabalala izizathu zokuthi kungani lo mthetho kumele wesulwe.

Uthe lo mthetho upha-mbene nomthethosisekelo njengoba ususa abantu ezindaweni asebezijwayele ubayise lapho bengazi ukuthi bazohlala kanjani khona.

“Lo mthetho awubavumeli abantu ukuthi babeke imibono yabo ngaphambi kokuthi kuthathwe isinqumo kodwa bavele banikwe izincwadi ezibatshelayo ukuthi bazosuswa,” usho kanje.

Uthe abantu kuthiwa abaphawule emuva kokuthi sesithathiwe isinqumo ngezimpilo zabo. u-Barnes uthe lo mthetho awubaniki oMasipala umhlahlandlela wokuthi kumele baluqhube kanjani uhlelo lokuqedwa kwemijondolo.

“Awukwazi ukuthi ulungise indawo uthi uyenza ngcono ube ukhipha abantu ezindlini zabo ngesikhathi esisodwa. Ijaji uTshabalala uke waphazamisa u-Barnes emtshela ukuthi isimo okuhlala kuso abantu basemjondolo sibi kakhulu njengoba kuhlale kubikwa mihla namalanga ngemililo, kungekho ngisho amanzi ahlanzekile. Obemele uNgqongqoshe wezezindlu kulesi sifundazwe, noMnyango wezezindlu kuzwelonke, uMnuz Jeremy Gauntlett, uthe akayiboni yena into ephambene noMthethosisekelo ngalo mthetho ngoba uhlose ukufeza izinhloso zoMnyango wezezindlu kuzwelonke wokuthi wonke umuntu kumele ahlale endlini ephephile. “Uma uNgqongqoshe wezezindlu esifundazweni eshaya umthetho, usuke elandele imigomo yoMnyango kuzwelonke. Akuvele kuthathwe ugandaganda kudilizwe izindlu kodwa kuqale kubhekwe ukuthi le ndawo abahleli kuyo ifanele yini ukuhlala abantu. Uma ifanele kuzanywa ukuthi kulungiswe yona kodwa uma ingalungile kumele bayiswe kwenye indawo engcono labo bantu,” usho kanje.

Uthe kungenzeka ukuthi into esusa umsindo ngama-gama asetshenzisiwe uku-chaza lo mthetho. U-Gauntlett uphinde wakhala ngokuthi abameli bale nhlangano basebenzise izitatimende ezishiwo ngabantu abangadalulwanga wabe esecela inkantolo ukuthi ingabuthathi ubufakazi babo njengobusemthethweni.

IJaji uTshabalala ucele ummeli waBahlali ukuthi aqhubeke namuhla noku-phikisa ezinye izinto ebezishiwo ngummeli woMnyango.

Isolezwe: Babhikishile abadilizelwe imijondolo

Leave a reply

http://www.isolezwe.co.za/index.php?fArticleId=4675234

Babhikishile abadilizelwe imijondolo

October 23, 2008 Edition 1

BAWINILE NGCOBO

BANCAMELE ukulova emsebenzini izolo abantu abaqashile emijondolo yase-Bottle Brush eMoorton, eChatsworth, bagcwala umgwaqo babhikisha bekhala ngokuba ngumtshingo ubethwa ngubani njengoba kudilizwa imijondolo abaqashe kuyo.

Lo mphakathi obungaphezu kwenkulungwane uhlanganele ehholo lendawo ufuna abaholi bophiko lwezindlu kuMasipala weTheku ukuthi bazothatha uhla lwezikhalo zabo.

Bakhala ngokuthi njengoba kunohlelo lokwakhiwa kwezindlu okuqhubekayo kule ndawo, omasitende – okungabanikazi bemijondolo abaqashe kuyo – bayabakhipha kulezi zindlu ukuze zidilizwe ngoba bazokwakhelwa izindlu zomxhaso.

Lo mphakathi uthi nawo bafuna ukubhekelelwa ngoba awazi uzoshona kuphi uma udilizelwa izindlu ofihla kuzo amakhanda.

Okhulumela lo mphakathi, uMnuz Falakhe Mhlongo, uthe sebeneminyaka engaphezulu kweyishumi bafika kule ndawo.

Uthe yize abantu abaningi bephuma esifundazweni sase-Mpumalanga Kapa, bafika ngomsebenzi bazithatha njengezakhamizi zakule ndawo ngoba uma bevota bavotela abaholi bakule ndawo, abaphindeli emakhaya beyovota.

“Singabavotela kanjani abantu okuthi uma sekufike intuthuko bese besikhiphela ngaphandle. Uma kuvotwa bafika bezosinxenxa ehholo basithembise izulu nomhlaba kodwa uma sesinezinkinga akusaqhamuki muntu,” kusho uMhlongo.

Uthe bafuna ukuthi kuhlakazwe ikomidi lomphakathi ukuze kukhethwe elisha ngoba balisola ngokudayisa izindlu.

Omunye wasebedilizelwe, uNksz Thobile Nogwina (31), uthe kuyimanje uhamba ecupha komakhelwane ngoba akasenandawo. “Izimpahla zami ngizibeke komakhelwane abahlukene ngoba angazi ngizoshonaphi,” usho kanje.

Laba bantu banikezele ngohla lwezikhalo zabo emakhanseleni akule ndawo, bawacela ukuthi aludlulisele eMnyangweni weZezindlu ngoba bafuna ukuthi abaholi balo Mnyango bafike bezoxoxisana nabo ukuthi le nkinga izoxazululwa kanjani.

Baphinde babhala incwadi esayinwe yikhansela le-ANC nele-Minority Front ebibeka umbandela wokuthi akekho umuntu ozodilizelwa umjondolo bengakafiki abaholi ukuzoxoxisana nabo. Le ncwadi inikwe bonke abebekulo mbhikisho ukuze makufika ugandaganda ibe ubufakazi bokuthi abangadilizelwa.

Ikhansela lakule ndawo, uMnuz Jayraj Singh, uthe njengoba kunohlelo oluqhubekayo lokwakhiwa kwezindlu, abantu abangu-946 kuphela abazohlomula kulo futhi yilabo abangomasitende.

“Inkinga isuke ngoba sekudilizwa izindlu kanti ziqashisile, abaqashile abasazi bazoshonaphi,” usho kanje. Uthe bazodlulisela uhla lwezikhalo zomphakathi kubaphathi bophiko lwezindlu kumasipala ukuze kuhlelwe umhlangano oyisipesheli wokubheka ukuthi luzoxazululwa kanjani lolu daba.

Isolezwe: Bebesho ukubakhipha ngodli ezindlini zomxhaso

Leave a reply

http://www.isolezwe.co.za/index.php?fArticleId=4612884

Bebesho ukubakhipha ngodli ezindlini zomxhaso

September 16, 2008 Edition 1

BAWINILE NGCOBO

KUSHUBE isimo eSiyanda, KwaMashu, eThekwini, izolo ngesikhathi abantu abahlala emijondolo yakule ndawo besho ukukhipha ngenkani abantu abebezofakwa ezindlini zomxhaso eziseKhulula ngase-Newlands West.

Amalungu omphakathi abedinwe eveva, ekhuza iziqubulo ezikhombisa ukungahambisani nokufakwa kwalaba bantu ezindlini, bebebabaza ukuthi bona namanje basahlala emijondolo, basalindile kodwa kukhona asebethola izindlu.

Ilungu lekomidi lomphakathi, uNksz Thembi Zungu, uthe kulezi zindlu bekufanele kungene bona njengoba besuswa emijondolo ababekwe kuyo okwesikhashana ngenxa yokwakhiwa komgwaqo onguthelawayeka kule ndawo.

“Abanye ababenemijondolo lapha kwa-C sebayiswa eMount Moriah (ngasePhoenix), thina esibalelwa ku-60 sasala kwathiwa uma sekuphele izindlu lezi eziyizitezi ezakhiwa ngaphansi kwe-project iKhulula yithina esizongeniswa kuzo,” usho kanje.

Uthe abazi ukuthi laba bantu asebezofakwa kulezi zindlu basuswaphi.

“Thina besisalindele ukuthi kubizwe umhlangano womphakathi, ikhansela lisitshele ukuthi ngobani abazongena ezindlini,” kusho uNksz Zulu.

Omunye ongene endlini yakhe izolo uNkk Keslina Zulu (69) uthe yena akayithenganga indlu kodwa kuyilungelo lakhe ukuthi ayithole njengoba eseyilinde iminyaka emibili.

“Sakhishwa eSiyanda kwa-B ngoba kuqedwa imijondolo sayiswa kwa-A emathinini lapho besifihle khona amakhanda kuze kube sithola izindlu,” usho kanje.

Uthe yize nazo lezi zindlu abathuthelwe kuzo zincane ayikho into abazoyenza ngoba bahluphekile.

Ikhansela laku-Ward 11, uMnuz Mduduzi Madondo, lithe laba bantu bangene kulezi zindlu ngokusemthethweni. “Kwaba khona isivumelwano sokuthi ingxenye yabantu ababehleli emathinini bazongeniswa kulezi zindlu uma seziphelile,” usho kanje

Ikhansela laku-Ward 41, uMnuz Linda Xaba, uthe uxakekile esezwa kuthiwa kukhona abantu abangene kulezi zindlu ngoba wazi ukuthi bekuzongena laba bantu abangu-60 abazosuswa ezindaweni zabo ngenxa yokwakhiwa komgwaqo.

Isolezwe: Umunyu kuthunwa abahlanu abafa ngomlilo

Leave a reply

http://www.isolezwe.co.za/index.php?fArticleId=4552960

Umunyu kuthunwa abahlanu abafa ngomlilo

August 11, 2008 Edition 1

BAWINILE NGCOBO

BEKUWUSIZI lodwa ehholo lase-Cato Crest, eThekwini ngoMgqibelo, enkonzweni yokufihla amalungu amahlanu omndeni wakwaMaqhasha owabhubha ngesonto eledlule ngesikhathi umlilo ungqongqisa umjondolo wabo.

Kulesi sehlakalo kwaphinde kwashona owesifazane kanye nengane yakhe ababevakashile.

Amalungu omndeni wakwaMaqhasha ashona kubalwa uLuvuyo (14), uNoluthando (9), uMfundo (24), uPhezile (20) obenezinyanga eziyisishiyagalombili ekhulelwe noSphelele (2) nababevakashile uZo Dlamini (31) nengane yakhe enezinyanga eziyisikhombisa.

Ikhansela lendawo, uNkk Gloria Borman uthe indawo yaseCato Crest ijwayele ukuba nemililo kodwa kuyaqala ukuthi kuphume imiphefumulo eminingi kangaka ngesikhathi esisodwa.

“Inkinga enkulu esinayo wukuthi imijondolo isondelene kakhulu lokhu okwenza ukuthi kube nzima ukufinyelelisa usizo lapho ludingeka khona,” kusho uGloria.

Uthe inselelo ebhekene nohulumeni ukuqeda imijondolo ukuze abantu bahlale ezindlini ezinamanzi kanye nogesi.

“Njengekhansela nginomsebenzi wokuthi ngenze ngcono izimpilo zabantu. Sesiqalile ukwakha izindlu kodwa sekuyabonakala ukuthi kunesidingo sokuthi lolu hlelo lusheshiswe ukuze le ndawo ibe ngephephile kubo bonke abahlala kuyo,” kuchaza uGloria.

USomlomo eMkhandlwini weTheku, uMnuz James Nxumalo udlulise amazwi enduduzo emndenini.

“Thina njengohulumeni sizibophezele ekusebenzeleni abantu. Akekho umuntu okufanele kubonakale ubumpofu bakhe noma sekwenzeke into efana nale sibe sikhona,” kusho uNxumalo.

UMnyango wezokuThuthukiswa koMphakathi nezeNhlalakahle uthwale zonke izindleko zomngcwabo wabashonile.

UNgqongqoshe woMnyango, uMnuz Meshack Hadebe, uthe abezile emngcwabeni ukuzokhankasela ukhetho kodwa bazokwenza umsebenzi wabo wokunakekela abantu.

“Ngiyazi ukuthi kukhona abazongibuza ukuthi kudle malini ukusingatha lo mngwabo kodwa bangabuzi ukuthi ngizokwenzenjani ngamalungu omndeni asele. Ngeke size siyeke abantu bakithi badliwe yizinja ngoba sesaba ukuthi kuzothiwa simosa imali,” kusho uHadebe.

Okhulumela umndeni, uNksz Nokulunga Maqhasha ubonge bonke ababasingathile kulesi sikhathi.

“Into efana nale ungathi ingephinde yenzeke,” kusho uNokulunga.

USihlalo we-ANC esifundeni seTheku, uMnuz John Mchunu unxuse umphakathi ukuthi ubambisane nohulumeni uma kulethwa uhlelo lwezindlu.

“Siyacela ukuthi uma kufika isikhathi sokuthi kunikezelwe izindlu, abantu bathambise izinhliziyo bathathe izindlu lapho zisuke zakhiwe khona bangenqabi ukusuka ezindaweni zabo ngoba kusuke kubhekelelwa bona,” kuchaza uMchunu.