Isolezwe: Luqale phansi uchuku epulazini iNew Venture

http://www.isolezwe.co.za/index.php?fArticleId=4260406

Luqale phansi uchuku epulazini iNew Venture

Isolezwe
February 18, 2008 Edition 1

PHILI MJOLI

ASIKHO isisombululo sezinkinga ezibhekene nomphakathi waseSibhonsweni, eMelmoth, enyakatho yeKwaZulu-Natal, ohlala epulazini i-New Venture ngaphandle kokuthi umhlaba walo ubuyiselwe kubantu.

Lokhu kushiwo nguMnuz Sipho Dlamini okhulumela uMnyango wezemiHlaba kulesi sifundazwe ngemuva kokuthi lo mphakathi utshele leli phephandaba ukuthi lo Mnyango uhudula izinyawo ekuxazululeni izinkinga zawo nomnikazi wepulazi.

Nyakenye lo mphakathi wabulala imenenja yakuleli pulazi, uMnuz Kenneth Eva, okuthiwa waqhumisa isibhamu emhlanganweni nalo mphakathi kukhona okwakungavunyelwananga ngakho.

Ngemuva kwalokhu kwajutshwa umxazululi nomhloli womhlaba owayezobheka ukuthi ngabe indawo okuhlala kuyo umphakathi isepulazini noma qha, njengoba umphakathi wawukholelwa wukuthi umlimi uzisikela kwelinonile emhlabeni wokhokho bawo.

UDlamini uthe umphakathi awuzange uwamukele umbiko owawuchaza ukuthi le ndawo isepulazini.

“Umxazululi owayejutshwe ukuthi akhe ubudlelwano phakathi kwale mikhombe eyalanayo wehlulekile wagcina ngokuqhamuka namasu okuthi baphilisane okwesikhashana,” kuchaza uDlamini.

UDlamini ubesho lokhu nje umphakathi wakule ndawo, obuwesekwe ngabahlali basemijondolo baseThekwini, bemashela ukuhlukunyezwa ngumnikazi wepulazi ngoLwesihlanu.

UNkk Tsamayile Myeza uthe izingane zabo ezifunda esikoleni samabanga aphezulu eMlalazi ezilandwa yimoto, ziya esikoleni uma kuthanda umlimi.

“Izingane zethu zivuka zithi ziya esikoleni zibuye endleleni zithi zifike onogada bethi akudluli lutho,” kusho uNkk Myeza.

Uthe ngo-2005 no-2006 wadilizelwa umuzi wakhe owawunamagumbi ayisishiyagalolunye, nguye umnikazi wepulazi owayethi akasabadingi kule ndawo.

Lezi zindlu ezadilizwa, lo mphakathi uthe uzifuna zakhiwe ngoMashi.

Induna yakule ndawo, uMnuz Mhlangabezi Zulu, uthe abantu bahlale bethathwa izithombe noma kuthiwe abalethe omazisi babo ngaphandle kwemvume yabo.

Kucishe kwasuka esikhulu isidumo ngesikhathi imenenja yepulazi, uMnuz Rooney Subramoney, ethi uhla lwezikhalo ngeke alwemukele futhi lo mphakathi ungalokothi ungene umasha kuleli pulazi.

Lo mphakathi wona ubuthi incwadi ebavumela ukuthi bamashe ithe bazongena epulazini baze bafike emzini womninipulazi, uMark Chenells, uma sebeqedile bahambe ngomgwaqo uCetshwayo baye emakhaya.

USupt Steve van Vuuren, osayine le ncwadi, uthe wayengazi ukuthi umgwaqo okuzohanjwa kuwo usepulazini.

USubramoney unqabile ukuphawula ngezinsolo zalo mphakathi, wathi lolu daba lusenkantolo.