http://www.isolezwe.co.za/index.php?fArticleId=4923913

Banqunyelwe okatiki abahlala emijondolo

April 06, 2009 Edition 1

MLUNGISI MHLOPHE

UMASIPALA weTheku unqumele ugwayi katiki izakhamizi zasemijondolo kwaDlamini, eNazaretha, ngasePinetown ukuba kuthi kufika uLwesithathu kuleli sonto zibe seziphume zaphela ezindlini zazo ngoba zizobhidlizwa.

UNksz Phumelele Mthethwa (35) nosana lwakhe olunamasonto amabili, uKhulekani Zulu, ngabanye bemindeni engaphezu kweyikhulu esilala obenyoni kulandela ukutshelwa ukuthi bazodilizelwa imijondolo yabo.

Ngeledlule uMasipala udilize imijondolo engu-15 waphinde waxwayisa abantu abahlala lapha ukuthi uzobuya ngaphambi kukaLwesithathu azoqedela eminye esele. Yonke imijondolo edilizwayo kumanje isifakwe uphawu luka-X.

Abanikazi bayo banxusa uMasipala ukuthi ubabekezelele ngesikhathi besafuna ezinye izindawo.

“Sithwele kanzima, asazi ukuthi sizolibhekisaphi njengoba kumele sisuke lapha,” kubalisa uNksz Mthethwa.

Okhulumela uMnyango wezeZindlu kuMasipala weTheku, uMnuz Nigel Gumede, uthe bazoqhubeka nokudiliza le mijondolo ngoba yakhiwe ngokungemthetho.

Uthe le mijondolo yakhiwe endaweni ebekelwe ukuthuthukiswa.

UGumede uthe ngisho nomthetho i-Slums Act osanda kuphasiswa yinkantolo eNkulu yaseThekwini, uyabagunyaza ukuthi bayibhidlize le mijondolo.

Ngakolunye uhlangothi, ezinye izakhamizi kule ndawo zithi le ndawo ngeyobabamkhulu bazo njengoba iningi lazo lithi lazalelwa kuyo.

Okhulumela abahlali kule ndawo, uMnuz Jabulani Phili, uthe abaphikisani nohlelo lukahulumeni lokuqeda imijondolo kodwa abalwa nakho ukukhishwa ngesankahlu ezindlini zabo bebe bengakahlinzekwa ngezinye izindawo.