Category Archives: S’celo Khuzwayo

Isolezwe: Abasemijondolo sebefake uHulumeni enkantolo

Leave a reply

http://www.isolezwe.co.za/index.php?fArticleId=4453150

June 13, 2008 Edition 1

Abasemijondolo sebefake uHulumeni enkantolo

S’CELO KHUZWAYO

INHLANGANO ebhekelele amalungelo abantu abahlala emijondolo, Abahlali Basemijondolo KwaZulu-Natal, isifake amaphepha enkantolo eNkulu yaseThekwini ngenhloso yokuthi kuchithwe umthetho ophasiswe wuMnyango wezeziNdlu okuhloswe ngawo ukulwa nokuvumbuka kwemijondolo, i-Prevention and Elimination of Re-emergence of Slums.

UMengameli wale nhlangano, uMnuz S’bu Zikode, utshele Isolezwe izolo ukuthi abameli babo sebemi ngomumo, njengoba sebewa-fakile amaphepha enkantolo ePhakeme yaseThekwini, wathi uma kungukuthi bayahluleka kule nkantolo bazimisele ukuhamba ibanga elide.

“Uma singaphumeleli sizoludlulisela eNkantolo yoMthetho-Sisekelo lolu daba ngoba sinenkolelo yokuthi lo mthetho uphambana nama-lungelo abantu abekwe kuMthetho-Sisekelo futhi awusihloniphi isithunzi somuntu,” kusho uZikode.

UZikode uthe yize benga-phikisani nokuthi kulawulwe ukwakhiwa kwemijondolo, kodwa bafuna ukuthi uma umuntu ekhishwa emjondolo afakwe endlini, angalindiswa komunye umjondolo njengoba ethi kunemijondolo ebizwa ngokuthi ngama-Transit Camps okumele umuntu alinde kuyo uma ‘esekhishwe’ emjondolo wakhe.

Lo mthetho ugunyaza omasipala ukuthi babale imijondolo bese bevimbela ukwakhiwa kweminye emisha.

Okhulumela uMnyango wezeziNdlu KwaZulu-Natal, uMnuz Lennox Mabaso, uthe inhloso ngqangi yalo mthetho wukuvimbela ukuvumbuka kabusha kwemijondolo, wathi njengohulumeni bayakwemu-kela ukuthi uma kukhona abangenelisekile ngalo mthetho bathathe izinyathelo.

Uthe nabo sebekulungele ukubhekana naBahlali Basemjondolo enkantolo.

Isolezwe: Basale dengwane kusha imijondolo

Leave a reply

http://www.isolezwe.co.za/index.php?fArticleId=4185898

Basale dengwane kusha imijondolo

December 27, 2007 Edition 1

S’CELO KHUZWAYO

NGESIKHATHI imindeni eminingi ijabulela ukuhlangana nezihlobo nabangani kugujwa usuku lukaKhisimusi, imindeni engaphezu kuka-200 ibiqhatha usizi ngemuva kokusha kwemijondolo yayo e-Foreman, e-Sydenham, eThekwini, ngoLwesibili ebusuku.

UMnuz S’bu Zikode, wenhlangano yabahlali basemijondolo eThekwini, uthe kukholakala ukuthi lo mlilo oqale ngabo-11 ebusuku uqutshulwe yikhandlela kanti ushe kwacishe kwasa.

“Kunowesifazane okukholakala ukuthi ushiye ikhandlela livutha nokuthe uma esebuya wathola ukuthi umlilo ususha ubuhanguhangu wabe usuthungeleka nakweminye imijondolo,” kusho uZikode.

Uthe lesi sigameko sibashiye beshaqekile, ikakhulukazi njengoba abantu bebejabulele usuku lukaKhisimusi. Ngesikhathi ekhuluma neSolezwe izolo, uZikode uthe abanikazi bemijondolo eshile bebema-tasatasa bezama ukuvusa imijondolo yabo, kanti abanye bahlaliswe ehholo lomphakathi e-Sydnham.

Uthe ngesikhathi kwenzeka lesi sigameko iningi lezakhamizi belingekho kule ndawo njengoba beligubha uKhisimusi nemindeni yalo emakhaya.

“Yize kunjalo kodwa iningi labantu lishiya impahla eningi ezindlini. Yonke-ke leyo mpahla ishe yaba wumlotha,” usho kanje.