Category Archives: Boniswa Mohale

Isolezwe: Inhlangano ikhala ngesimo emijondolo

http://www.isolezwe.co.za/index.php?fArticleId=5293236

Inhlangano ikhala ngesimo emijondolo

December 21, 2009 Edition 1

Boniswa Mohale

INHLANGANO ebhekele ukuthula emhlabeni i-Amnesty International isikhiphe isitatimende lapho ithi iNingizimu Afrika yehlulekile ukuphenya ngezenzo zokuhlukunyezwa kwamalungelo abantu emijondolo ekuKennedy Road eClaire Estate, eThekwini.

Le nhlangano, amaphoyisa nethimba elalijutshwe ukwenza uphenyo ngokuhlukunye-zwa kwamalungelo abantu baphenya ngesigameko sakamuva sokubulawa kwabantu ababili kuleya ndawo.

Le nhlangano ithi labo abebeseqhulwini lophenyo bathi indlela obekusinge-thwe ngayo uphenyo ibinokwenzelela kungabhekwa zonke izinhlangothi.

Kulesi sitatimende kuthiwa nakuba kwacelwa ukuthi kujutshwe abaphenyi abazimele abangeke bazwelane nohlangothi oluthile ngo-Okthoba, kodwa lokhu akwenzekanga.

Ababulawa kulesi sigameko ngoMnuz Thabani Ndlovu noMnuz Thokozani Mnguni.
Click here!

“Abantu abahlaselwa abasakwethembi ukusebenza komthetho ngenxa yokuthi lolu dlame aluphenywanga ngendlela okuyiyo,” kuphetha lesi sitatimende.

Isimo kuthiwa sisashubile kuKennedy Road njengoba amalungu Abahlali baseMjondolo, okuyinhlangano elwela amalungelo abantu ezindaweni ezifuze lena, behlezi lubhojozi.

Kusanda kuqubuka lolu dlame kwaboshwa abantu abangu-13 okwakulokhu kuhlehliswa icala labo ngenxa yokuthi kwakungaziwa ukuthi ngobani abathintekayo ezigamekweni zokubulala.

Abantu abangu-8 bagcina ngokudedelwa kwasala abangu-5 ababhekene namacala.

Isolezwe: Bazitapele ezitolo bekhala ngendlala

Leave a reply

http://www.isolezwe.co.za/index.php?fArticleId=5095504

Bazitapele ezitolo bekhala ngendlala

July 23, 2009 Edition 1

BONISWA MOHALEnoCELANI SIKHAKHANE

KUQUBUKE igidigidi enkabeni yedolobha iTheku izolo ngesikhathi iqulu labantu, elizibiza ngabantu abangasebenzi, ligasela ezitolo ezinkulu zokudla lizitapela ukudla okubizayo kanti abanye bebezitika ngakho khona ngaphakathi.

Laba bantu iningi labo obekungabesifazane bathi bangamalungu enhlangano, i-Unemployed Peoples Movement of South Africa.

Izitolo ezehlelwe yilo mshophi kubalwa uShoprite oseBerea Centre, uShoprite okuWest Street noPick ‘n Pay eWorkshop.

Abasebenzi bakulezi zitolo bathi leli qulu elilinganiselwa ku-300 lingene njengabantu abasuke bezothenga ladonsa izinqola lalayisha izinhlobonhlobo zokudla.

Kuthiwa ngesikhathi sebefika lapho kukhokhwa khona badudule abantu abebelinde ukukhokha badlula ngehubo.

Izimpahla abaqinise kuzo ngamafutha, inyama, balayisha noncamnce neziphuzo.

Sebephumile kuthiwa bebememeza bethi iMeya yeTheku, uMnuz Obed Mlaba, nguye ozokhokha ngoba abasebenzi futhi kade babemxwayisa ngalesi simo.

Amaphoyisa athwale kanzima bezama ukubavimba abanye bephucwa ngesidlozana impahla abese beyilayishe ezinqoleni.

UMnuz Bheki Mthombeni, oyisikhulu kwaShoprite obethukile, uthe basazobheka ukuthi balahlekelwe kangakanani njengoba isitole siphenduke umazitapele.

UCaptain Khephu Ndlovu uthe kuboshwe abantu abangu-100 abazobhekana namacala.

Iningi lababoshiwe bekungabesifazane.

UNksz Nozipho Mteshana, okhulumela i-Unemployed Peoples Movement of South Africa okungamalungu abo lawa aboshiwe, uthe kuseyisiqalo lesi basazoqhubeka nokungenela izitolo ngoba uhulumeni akafuni ukulalela izikhalo zabo.

Esitatimendeni esithunyelwe ngabakwa-Shoprite bathe ukwebiwa kwezimpahla ezitolo kubalahlekisela ngezigidi kanti lesi sitolo sivule amacala angu-40 okweba izolo bathi njengoba lolu daba seluphethwe ngamaphoyisa angeke baphawule kakhulu.

Isolezwe: Baswele indawo yokukhosela abashelwe yimizi

Leave a reply

http://www.isolezwe.co.za/index.php?fArticleId=4772103

Baswele indawo yokukhosela abashelwe yimizi

December 23, 2008 Edition 1

Boniswa Mohale

MANCANE amathemba okuthi uKhisimusi uzofika abantu basemijondolo ekuKennedy Road, eThekwini, sebenezindlu zokukhosela njengoba beshelwe ngamakhaya abo ngeSonto ekuseni, njengoba kuze kube yimanje abaka-lutholi usizo kuMasipala weTheku.

Laba bantu abalinganiselwa ku-200 okumanje abanamakhaya njengoba ecekelwe phansi wumlilo, bakhala ngekhansela lendawo abathi alikaxhumani nabo ukuzobheka isimo abahleli ngaphansi kwaso, futhi nabophiko lukaMasipala lwezinhlekelele nabo bebengakaze bafike.

Ngesikhathi Isolezwe lixhumana nekhansela lakule ndawo, uMnuz Yacoob Baig, uthe useshayele izinhlangano eziletha ukudla ukuba zizosiza lo mphakathi, kodwa leli phephandaba lifike kule ndawo abantu besakhala ngendlala, abanye bezama ukuvusa amakhaya abo.

UMnuz Sfiso Ngubo (40) oficwe ematasa nezigxobo zokwakha uthe emva kokuqhuqhwa ngamakhaza akuthangi unqume ukuyozithengela lokho okuncane akwaze ukukuthola ngamasentshana abewalondolozele uKhisimusi.

“Ngibone kungcono ukuthi ngiqale ngophahla ngoba sengikhathele ukulala ehlane kuhle kwesilwane kodwa amakhaza asazodlala ngami njengoba ngisele nalokhu okusemzimbeni,” kuchaza uNgubo

Uqhube wathi ukuba bekukhona ugesi namanzi eduzane ngabe bayakwazi ukugwema le mililo esiyinsakavukela umchilo wesidwaba kule mijondolo.

Amazwi kaNgubo aphinde agcizelelwa ngokhulumela abahlali basemjondolo, uMnuz Sbu Zikode, othe imililo eyenzeke kulo nyaka idalwa ngamakhandlela nezitofu, ukuba bekukhona ugesi ngabe sebeyakwazi ukuvimba izigameko ezinje ngalezi.

UBaig uthe ube nenkinga yokuxhumana nezinhlangano ezeseka abantu ngesikhathi sezinhlekelele, kodwa namhlanje iPakistani Association in South Africa izohambisa izingubo zokulala nokudla kuKennedy Road.

Ebuzwa ukuthi izinto zokwakha zizofika nini uthe uhlangabezane nezingqinamba eziningi ngoba abantu ababhekele izinhlekelele kumasipala weTheku baseholidini kodwa uyethemba ukuthi lizoshona elanamhlanje abesitolo sezinto zokwakha sebezidilivile izinto zokwakha.

Isolezwe: Bazowudlela ehlane uKhisimusi

Leave a reply

http://www.isolezwe.co.za/index.php?fArticleId=4771129

Bazowudlela ehlane uKhisimusi

December 22, 2008 Edition 1

Boniswa Mohale

BANGASE badlele uKhisimusi emakhazeni abahlali bakuKennedy Road, eThekwini, ngemuva komlilo oshiye dengwane imindeni ewu-20 entathakusa yayizolo.

Lesi sigameko sokusha kwemijondolo kule ndawo ngesesishiyagalombili kulo nyaka kanti okhulumela inhlangano yabahlali basemijondolo, uMnuz Sbu Zikode, uthe kushe imijondolo elinganiselwa ku-30.

Uqhube wathi inkinga kule mijondolo wukuthi izidingongqangi ezifana namanzi nogesi kukude nabantu bese kuba khona abazixhumela ugesi ngokungemthetho.

Ngesikhathi leli phephandaba livakashele le ndawo lifice abantu bezama ukubheka okusele emlotheni, abanye bese beqalile ukuvuselela imijondolo ngamapulangwe nothayela abangashanga kakhulu.

UNksz Khethiwe Vundisa (44) waseNtabamhlophe, eNewcastle, oseneminyaka eyisithupha ehlala kule mijondolo, uthe uvuswe wumsindo wabantu akade bebheka ukuthi bakhona yini omakhelwane abasalele.

“Ngivuke ngathatha isikhwama sami esinepasi, okokugqoka anginakho, ngisele nale ngubo engiyigqokile futhi nokudla ngikugcine ngoMgqibelo,” kusho uNksz Vundisa

Ikhansela le ndawo, uMnuz Yacoob Baig, lithe lizoxoxisana nomasipala ukuthi ulethele izakhamuzi izinto zokwakha kabusha imijondolo yazo, lathi ukudla kuzofika namhlanje.