Category Archives: Isolzwe

Isolezwe: Kufe ababili kusha imijondolo

Leave a reply

http://www.isolezwe.co.za/index.php?fArticleId=4085037

Kufe ababili kusha imijondolo

July 05, 2010 Edition 1

MLUNGISI MHLOPHE

KUSHONE abantu ababili abashe bangqongqa ngesikhathi kusha imijondolo engaphezu kuka-500 kuKennedy Road, eThekwini, izolo entathakusa.

Yize amaphoyisa ethe kufe abantu ababili kule ngozi kodwa amalungu omphakathi athe bane abantu abashonile.

Siye koshicilela labo abashonile bengakahlonzwa njengoba izihlobo zabo bezingakatholakali.

Lo mlilo, oshiye iningi labantu lisele dengwane kule ndawo, kuthiwa uqale ngehora lokuqala entathakusa.

Ngesikhathi Isolezwe lifika kule ndawo ngabo-9.30 ekuseni bekusashunqa intuthu abezicishamlilo beqedela ukucima.

Abanye abantu bebebeke izimpahla zabo ezisindile eceleni komgwaqo njengoba izindlu zabo bezicekeleke phansi. Abanye bebematasa bezama ukuvusa imizi yabo ukuze bakwazi ukufihla ikhanda.

Omunye wabashelwe yimizi, uNksz Thembeka Hlatshwayo, uthe akazi ukuthi uzolala kuphi nomfowabo omncane onezinyanga ezintathu uNhlanhla njengoba umjondolo wakubo ushe waphela.

“Ngiphaphame ngehora lesithathu entathakusa ngemuva kokuthi ngizwe umsindo abantu bebemeza nathi savuka sabaleka. Sibonga uMdali ukuthi sisindile njengoba sizwa kuthiwa kushone abantu abane ngenxa yalo mlilo,” usho kanje.

UMnuz Sanele Mbambo, naye oshelwe yindlu yakhe, uthe ubeyingxenye yabantu abakhiphe ikhehla nowesilisa emzini yabo ngezikhathi zehora lesithupha ekuseni abashe bangqongqa kulo mlilo.

“Ngesikhathi sibakhipha ezindlini zabo bese bevele beshonile,” kusho uMbambo.

Le ndawo ijwayele ukuhlaselwa umlilo njengoba sekube nezigameko cishe minyaka yonke.

Okhulumela amaphoyisa aseThekwini, uLt Colonel Jay Naicker, uthe amaphoyisa aqaphe isimo kule ndawo.

“Amaphoyisa avundulule izidumbu ezimbili zabesilisa omunye wabo oneminyaka elinganiselwa ku-70 omunye kwengu-34,” usho kanje.

UNaicker uthe bangu-2 000 abantu abasele dengwane ngemuva kokuqubuka kwalo mlilo, wengeza ngokuthi bathole ukuthi umlilo udalwe ukubhamuka kwesitofu sikaphalafini. Uthe kuvulwe idokodo lophenyo.

Isolezwe: Bafuna ukuvikela imijondolo Abahlali

Leave a reply

http://www.isolezwe.co.za/index.php?fArticleId=3895535

June 21, 2007 Edition 1

INHLANGANO emele abahlali basezindaweni eziyimijondolo eyaziwa ngokuthi Abahlali baseMijondolo, isisabise ngokuthi izothathela uHulumeni waKwaZulu-Natal izinyathelo zomthetho uma kuwukuthi namuhla isiShayamthetho sesifundazwe siyawuphasisa umthetho okuhloswe ngawo ukuthi kuqedwe nya ukwakhiwa kwemijondolo.

Izolo le nhlangano uzwakalise ukuthi izophuma nxa zonke ukulwisana nokuphasiswa komthethosivivinyo, i-Elimination and Prevention of the Re-emergence of Slums Bill.

Lo mthetho kulindeleke ukuthi namuhla udingidwe ngamalungu esiShayamthetho, bese uyavotelwa kanti abukeka emaningi amathuba okuthi uphasiswe.

Ngokusho kukaMengameli wale nhlangano (Abahlali baseMjondolo), uMnuz Sbu Zikode, kabahambisani nalo mthetho wathi uhlose ukuzobahlukumeza njengabahlali.

“Okubuhlungu ngalo mthetho wukuthi ulimaza amalungelo abahlali futhi uyashayisana nomthethosisekelo wezwe. Thina bahlali asizange sithintwe, kunalokho sitshelwe ukuthi sizoya ePhalamende kusasa ukuyobukela. Sizokwenza konke okusemandleni ukuthi lo mthetho ungaqhubeki,” kusho uZikode.

Uqhube wathi kumanje lolu daba sebevele sebeluthathile balubeka ezithebeni zabameli babo, nanti zikhona nezincwadi abathi sebezibhalele uMnyango wezeZindlu oholwa nguNgqongqoshe uMnuz Mike Mabuyakhulu (osesithombeni).

Ngokusho koMnyango kaMabuyakhulu, lo mthetho kuhloswe ngawo ukuthi kushabalaliswe yonke imijondolo futhi kunqandwe nokuvumbuka kwemisha.

Isitatimende esithunyelwe nguMnyango izolo, siveza ukuthi lo mthetho uzobe ungowokuqala kuleli kanti uphokophele ekufezeni iphupho likaHulumeni lokuqeda imijondolo ngonyaka ka-2014.

Uma uphasa lo mthetho uzonikeza omasipala ilungelo lokubheka isibalo semijondolo engaphansi kwayo kanti umnyango usamile ekuqhubekeni nokwakha izindlu ezisezingeni, ukuphucula izimpilo zabantu.